BOOK DETAILS
ဘာလဲဟဲ့ လူ့ငရဲ
epub, kfx
၁၉၈၉ ခုနှစ်မှ ၂၀၀၈ ခုနှစ်အထိ နအဖ၏ မတရားဖမ်းဆီး ထောင်ချခံရသည့်ကာလအတွင်း ထောင်တွင်းအတွေ့အကြုံများကို စုစည်းရေးသားထားသည့် စာအုပ်ဖြစ်ပြီး စာရေးသူ၏ အမှာစာ ပါရှိသည်။
ဦးဝင်းတင်က “နှစ် (၅၀) ကျော် မြန်မာ့သမိုင်းမှာ မှေးမှိန်ရုံမက ပျောက်ကွယ်နေခဲ့တယ်လို့ ဆိုရမလောက် အခြေဆိုးစိုက်နေတဲ့ ထောင်ဘဝစာပေတွေ၊ အကျဉ်းသားဘဝစာပေတွေ၊ နရသိန်အဖြစ်ဆိုး စာပေတွေရဲ့ ဟင်းလင်းကွက်လပ်မှာ တဆုတ်တဖဲ့ ဖြည့်တင်းချင်တဲ့စိတ်နဲ့ ဒီစာစုကို ကျနော်ရေးပါတယ်” ဟု ပြောသည်။
အမှာစာ၏အဆုံးပိုဒ်တွင် “ရဲဘော်၊ လုပ်ဖော်၊ လူထုလူငယ်အပေါင်းတို့ စစ်အာဏာရှင်စနစ်ဆိုးရဲ့လူ့ငရဲကျိန်စာမှ ကျော်နင်း လွတ်မြောက်နိုင်အောင် တိုက်ပွဲဝင်ကြ၊ စစ်အာဏာရှင်စနစ်ရိုင်းရဲ့လူ့အခွင့်အရေးချိုးဖောက်မှုှ စက်ကွင်းမှ ကျော်နင်း လွတ်မြောက်အောင် တိုက်ပွဲဝင်ကြ” ဟုလည်း တိုက်တွန်းပြောကြားထားသည်။
စာအုပ်ဖြန့်ချိပွဲသို့ ဗွီဒီယိုဖြင့် ဦးဝင်းတင်ပေးပို့သည့် မွေးနေ့စကားသဝဏ်တွင် “ဒီနေ့ ဒီအချိန်ဟာ ဒီမိုကရေစီအင်အားစု တွေအတွက် အမွန်းကျပ်ဆုံး ကာလဖြစ်တယ်။ စစ်အာဏာရှင်တွေက သူတို့ရဲ့အသက်ဆက် ယန္တရားကို စက်ကုန်ဖွင့်ဖို့ မီးကုန်ယမ်းကုန် စိုင်းပြင်းနေပါပြီ။ စစ်အာဏာရှင်တွေက ပြည်သူလူထုကို ကျီးကန်းတောင်းမှောက် လှည့်စားဖြားရောင်းမယ်၊ သေလုမျောပါး ဖိနှပ်ချုပ်ချယ်မှုကို တိုးလို့တိုးလို့သာ စစ်ဖိနပ်နဲ့နင်းတော့မယ်။ ဒီမိုကရေစီအင်အားစုတွေ အားလုံးအတွက်လည်း သူသေကိုယ်ရှင် တုံ့ပြန်ဆန့်ကျင် တိုက်ပွဲဝင်ကြရတော့မယ်။ ဒီလိုကာလမျိုးဆိုက်လာချိန်မှာ ကိုင်စွဲစရာ လက်နက်သုံးမျိုးသာ ကျနော်တို့မှာ ရှိပါတော့တယ်။ မကြောက်တရားလက်နက်၊ သွေးစည်းညီညွတ်ရေးလက်နက်၊ စစ်အာဏာရှင်စနစ်ဆန့်ကျင်ရေး ရည်မှန်းချက်ပန်းတိုင် တခုတည်း ချမှတ်ရှေးရှုရင်ဆိုင်ချီတက်ရေး လက်နက်ပဲဖြစ်တယ်။ (၈၀) နှစ်ပြည့်မွေးနေ့မှာ ဒီလို သဝဏ်စကားပါးခွင့်ရတာ ဝမ်းသာတယ်၊ ကျေနပ်တယ်၊ အားရတယ်၊ အရေးတော်ပုံအောင်ရမည်” ဟု ပြောကြားသည်။
စာအုပ်ထုတ်ဝေရန် စီစဉ်သည့် ဒီဗွီဘီမှ ကိုအောင်ကြီးက “ထောင်ထဲမှာ (၁၉) နှစ်ကျော် ဒုက္ခခံစားလာရတဲ့ လူတယောက်ရဲ့ ခံစားမှုကို တကမ္ဘာလုံးက သိသွားအောင် သူ့ရဲ့စာအုပ်ထုတ်ချင်တဲ့ ပြင်းပြတဲ့အာသီသကို ကျနော်တို့က ဖြည့်ဆည်းပေးတာပါ။ မြန်မာပြည်မှာ ထုတ်ဖို့ဆိုတာကလည်း မလွယ်ဘူး။ ဒီစာအုပ်ထွက်ရင် သူဘာဖြစ်နိုင်မှာလည်း ကျနော်တို့စဉ်းစားတယ်။ ဒီစာအုပ်နဲ့ ပတ်သက်ပြီး ဖြစ်လာမယ့် ပြဿနာအားလုံးကို သူရင်ဆိုင်ဖို့ ဆုံးဖြတ်ပြီးသားလို့ ပြောတဲ့အတွက် ဒီစာအုပ်ကို ထုတ်ဖို့စီစဉ်ရတာပါ” ဟု ပြောသည်။
စာအုပ်ဖြန့်ချိပွဲနှင့်အတူ ဆရာကြီး၏ (၈၀) နှစ်ပြည့် မွေးနေ့ကိုလည်း ထိုင်း-မြန်မာနယ်စပ်တွင် ကျင်းပခဲ့ပြီး (၃၁၈) မျက်နှာပါရှိသည့် ဘာလဲဟဲ့လူ့ငရဲ စာအုပ်ကို ထိုင်းနိုင်ငံတွင် ဘတ် (၂၀၀) ဖြင့် ရောင်းချပြီး ပြည်ပနိုင်ငံတို့မှ အမေရိကန် (၁၅) ဒေါ်လာဖြင့် စာတိုက်သေတ္တာအမှတ် (၉၃) မဲဆောက်၊ တာ့ခ်ခရိုင်၊ ထိုင်းနိုင်ငံ၊ စာပို့သင်္ကေတ (၆၃၁၁၀) နှင့် [email protected] တို့တွင် ဆက်သွယ်မှာယူနိုင်သည်ဟု စာအုပ်ဖြန့်ချိသည့် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (မြန်မာနိုင်ငံ) ၏ တာဝန်ရှိသူတဦးက ပြောသည်။
အခန်းငယ် (၁၀) ခန်းနှင့် ဆောင်းပါးပေါင်း (၄၂) ပုဒ်ပါရှိသည့် အဆိုပါစာအုပ်ကို ဝယ်ယူဖတ်ရှုသည့် မြန်မာကုန်သည်တဦးက “ဒီစာအုပ်ထဲမှာက လက်ရှိမြန်မာထောင်တွေထဲက ဖိနှိပ်ညှဉ်းပန်းနှိပ်စက်မှုတွေကို ရေးထားတာဖြစ်တော့ အစိုးရကတော့ သူ့ကို အညှိုးအတေးထားပြီး ဒီစာအုပ်နဲ့ပဲ အချိန်မရွေး ထောင်ထဲပြန်ထည့်နိုင်တယ်။ စိတ်မကောင်းစရာတခုကတော့ စစ်ကြောရေးမှာ စစ်ထောက်လှမ်းရေးလက်ချက်နဲ့ သွားတွေအားလုံး ပြောင်သလင်းခါခဲ့တယ်လို့ ဖတ်ရတော့ ဒီအစိုးရဟာ သူတို့အာဏာကို ထိပါးလာမယ်ဆိုရင် ဘယ်လိုလူမျိုးကိုမဆို အပြတ်ရှင်းမှာပဲ။ ကျနော်ကတော့ ဒီစာကိုရေးရဲတဲ့ ဦးဝင်းတင်ရဲ့သတ္တိကို လေးစားတယ်” ဟု ပြောသည်။
အခမ်းအနားတွင် သတင်းစာဆရာကြီး ဦးဝင်းတင်၏ မြန်မာ့ဒီမိုကရေစီရေး စွန့်လွှတ်အနစ်နာခံ ကြိုးပမ်းမှုများကို ဆရာကြီး၏လုပ်ဖော်ကိုင်ဖက်များဖြစ်သည့် ပြည်သူ့လွတ်တော်ကိုယ်စားလှယ် ဒေါ်စန်းစန်းအပါအဝင် တက်ရောက်လာသူများက အမှတ်တရ ဂုဏ်ပြုစကားများ ပြောကြားခဲ့ကြသည်။ ခေတ်ပြိုင်မှ ကူးယူဖော်ပြသည်။
About Author
ဟံသာဝတီဦးဝင်းတင်
2 Booksဆရာကြီး ဦးဝင်းတင်ကို အဖ ဦးပု၊ အမိ ဒေါ်အမာတို့မှ ၁၉၃ဝ ပြည့်နှစ်၊ မတ်လ ၁၂ ရက်တွင် ပဲခူးတိုင်း၊ ကြို့ပင်ကောက်မြို့ ၌ မွေးဖွားခဲ့သည်။ ဦးဝင်းတင်သည် ၁၉၆၈ ခုနှစ်မှ ၁၉၇၈ ခုနှစ်ထိ မန္တလေးမြို့ထုတ် ဟံသာဝတီ သတင်းစာအယ်ဒီတာချုပ် အဖြစ် တာဝန် ထမ်းဆောင်ခဲ့သည်။ ထိုကာလအတွင်း အနောက် ဥရောပနှင့် အရှေ့ အာရှ နိုင်ငံပေါင်း ၂ဝ ခန့်သို့ သတင်းစာ ဆရာ တယောက် အဖြစ် လေ့လာရေး ခရီး သွားရောက် ခဲ့သည်။ ထိုခရီးစဉ် အတွင်း ရောက်ရာ အရပ်မှ နေ၍ သတင်းများ ရေးသားပြီး မြန်မာပြည်သို့ ပို့ခဲ့သည်။ ၁၉၇၂ ခုနှစ်တွင် ခြေတွင် စကား လက်ဖြား ကဗျာ မျက်နှာ ဇာတ်လမ်း ဆိုသည့် အမည်ဖြင့် စာအုပ် ထုတ်ခဲ့သည်။
ဆရာကြီး ဦးဝင်းတင်သည် သတင်းစာ ဆရာ ဘဝ ကိုသာ မြတ်နိုးပြီး ရာထူး ဂုဏ်ရှိန် များကို တတ်မက်ခဲ့သူ မဟုတ်ပါ။ ဟံသာဝတီ သတင်းစာမှာ အယ်ဒီတာချုပ် လုပ်ကိုင် နေစဉ်က ဦးဝင်းတင်ကို မဆလ အစိုးက ပြန်ကြားရေး ဌာနမှာ ဒုတိယ ဝန်ကြီး ပေးမယ်လို့ ကမ်းလှမ်း ခဲ့ဖူး သော်လည်း၊ ဦးဝင်းတင်သည် ထို ကမ်းလှမ်းချက်ကို လက်မခံ ခဲ့ပေ။ ၁၉၆၈ ကနေ ၁၉၇၂ အထိ အထက် ဗမာနိုင်ငံ စာရေး ဆရာ အသင်း စာဆိုတော်နေ့ စာတမ်း ဖတ်ပွဲများတွင် လူထု ဦးလှ၊ လူထု ဒေါ်အမာ တို့နှင့် အတူ ပါဝင် ဆောင်ရွက် ခဲ့သည်။ မန္တလေးတွင် ဟံသာဝတီ သတင်းစာ အယ်ဒီတာချုပ် အဖြစ် တာဝန် ယူရင်းပင် ရန်ကုန်သို့ ဆင်းကာ သတင်းစာ သတင်းများ တွင်လည်း ပို့ချပေး ခဲ့သည်။ သတင်းစာ သမိုင်း ပြုစုရန် ကိုလည်း ဦးထင်ကြီး၊ လူထု ဦးလှ၊ ရွှေဥဒေါင်း တို့နှင့် အတူ အထူး အားထုတ် ခဲ့သူ ဖြစ်သည်။
၁၉၇၇ - ၇၈ ခုတွင် မြန်မာ စာပေ လှုပ်ရှားမှု၌ အရေးပါသော မန္တလေး မြို့မှ ဟံသာဝတီ စနေ စာပေဝိုင်းကို ဦးဆောင် ကျင်းပခဲ့ပြီး စာတမ်း ဖတ်ပွဲများ ပြုလုပ် ပေးခဲ့သည်။ ထိုစာတမ်းများကို စာအုပ်အဖြစ်လည်း ရိုက်နှိပ် ထုတ်ဝေခဲ့သည်။
၁၉၇၈ ခုနှစ်မှာ ဦးဝင်းတင် ဦးဆောင် ကျင်းပတဲ့ စနေ စာပေဝိုင်းမှာ မဆလ တပါတီ လမ်းစဉ်ကို ဝေဖန်တဲ့ စာတမ်း တစောင် တင်သွင်း ဖတ်ကြား ခဲ့သည်။ ထို ဖြစ်ရပ်၏ ရလဒ် အဖြစ် အာဏာပိုင်များက ဟံသာဝတီ သတင်းစာကို ပိတ်ပစ် လိုက်ကာ ဦးဝင်းတင် ကိုလည်း ရာထူးမှ ထုတ်ပယ် ခဲ့သည်။
ဆရာ ဦးဝင်းတင်သည် စာပေ၊ ပန်းချီ၊ သဘင်၊ ဂီတ စသည် တို့နှင့် ပတ်သက်၍ ဆောင်းပါး၊ စာတမ်းနှင့် ဝေဖန် အကဲဖြတ်ချက် များကို 'ပေါ်သစ်' အမည်ဖြင့် ရေးသား ခဲ့ပြီး၊ 'ကွိ'၊ 'ဥတ္တရ အလင်း' စသည့် ဘာသာပြန် စာအုပ်များ ကိုလည်း ရေးသား ခဲ့သည်။ 'ကမ္ဘာနီတွင် တဒင်္ဂ' အမည်ရှိ ကွန်မြူနစ် နိုင်ငံများသို့ ခရီးသွား မှတ်တမ်း စာပေကိုလည်း ရေးသား ခဲ့သည်။ ပန်းချီ အကြောင်း ဖြစ်တဲ့ 'အလှ ရှာပုံတော်' ကိုလည်း ရေးသား ခဲ့သည်။ ဦးဝင်းတင် ရေးသား ထုတ်ဝေခဲ့သည့် အခြား စာအုပ်များမှာ 'ခြေတွင် စကား လက်ဖြား ကဗျာ၊ မျက်နှာ ဇာတ်လမ်း (မြန်မာ ဇာတ်သဘင် ဥရောပ ခရီး)' ဖြစ်သည်။
0 Reviews